Բահրեյնի մայրաքաղաք Մանամայում ընթացող ծանրամարտի աշխարհի առաջնությունում Հայաստանի ներկայացուցիչ Գարիկ Կարապետյանը վնասվածք ստացավ պոկում վարժությունում եւ հրաժարվեց հետագա պայքարից:
Տղամարդականց 109 կգ քաշայինների A խմբի պայքարում պոկում վարժությունում Կարապետյանը մեկնարկեց 183 կգ-ով եւ հաջողությամբ բարձրացրեց: Երկրորդ մոտեցման համար Փաշիկ Ալավերդյանը պատվիրեց 188 կգ, բայց Եվրոպայի չեմպիոնը չկարողացավ բարձրացնել: Երրորդ մոտեցմամբ 188 կգ-ը պոկելիս Հայաստանի ներկայացուցիչը չկարողացավ ֆիքսել ծանրաձողը գլխավերեւում եւ այն գցեց վրան: Կազմակերպիչներն անմիջապես փակեցին մրցահարթակը: Առաջնության գլխավոր բժշկի օգնությամբ Կարապետյանը կանգնեց եւ արմունկը բռնած լքեց մրցահարթակը:
Այս վարժությունում Գարիկ Կարապետյանը 183 կգ-ով նվաճեց փոքր արծաթե մեդալ, բայց չի կարողանա շարունակել հետագա պայքարը:
Գարիկ Կարապետյանը 2018 թ. պատանիների Եվրոպայի չեմպիոն է, 2019 թ. պատանիների աշխարհի փոխչեմպիոն, 2021 թ. երիտասարդների աշխարհի չեմպիոն, 2022 թ. երիտասարդների աշխարհի չեմպիոն, 2022 թ. Եվրոպայի Մ20 չեմպիոն: 2023 թ. ապրիլին Երեւանում անցկացված Եվրոպայի առաջնությունում նվաճել է չեմպիոնի տիտղոսը: Երկամարտի 392 կգ արդյունքով սահմանել է երեք ռեկորդ (178+214): 2023 թ. Եվրոպայի Մ20 չեմպիոն է, 2023 թ. աշխարհի առաջնության փոքր բրոնզե մեդալակիր եւ ռեկորդակիր, 2023 թ. երիտասարդների աշխարհի չեմպիոն, 2024 թ. Եվրոպայի առաջնության բրոնզե մեդալակիր, 2024 թ. աշխարհի գավաթի խաղարկության արծաթե մեդալակիր:
Մասնակցել է Փարիզի Օլիմպիական խաղերին: Ֆրանսիայի մայրաքաղաքում անցկացված 33-րդ ամառային Օլիմպիական խաղերի ծանրամարտի օլիմպիական մրցաշարի 102 կգ քաշայինների պայքարում Կարապետյանը երկամարտի 398 կգ արդյունքով 4-րդն էր (186+212):
Նոյեմբերին Լեհաստանում անցկացված Եվրոպայի Մ23 առաջնությունում երկամարտի 402 կգ արդյունքով դարձավ ոսկե մեդալակիր (182+220):
Մրցումային օրվա Հայաստանի վերջին ներկայացուցիչը Եվրոպայի փոխչեմպիոն Տաթեւ Հակոբյանն է (87 կգ):
Տաթեւ Հակոբյանը 2013 թ. Եվրոպայի Մ17 առաջնության բրոնզե մեդալակիր է, 2017 թ. Եվրոպայի առաջնության բրոնզե մեդալակիր, Եվրոպայի Մ23 առաջնության արծաթե մեդալակիր, 2018 թ. Եվրոպայի Մ23 չեմպիոն: 2019 թ. Բաթումիում անցկացված Եվրոպայի առաջնությունում 4-րդն էր, նույն տարվա աշխարհի առաջնությունում՝ 10-րդ-ը: 2021 թ. աշխարհի առաջնությունում Հակոբյանը երկամարտի 230 կգ արդյունքով 5-րդն էր: 2022 թ. Եվրոպայի առաջնությունում ձախողելուց հետո, 2023 թ. Երեւանում անցկացված Եվրոպայի առաջնությունում Տաթեւ Հակոբյանը 76 կգ քաշային կարգում երկամարտի 226 կգ արդյունքով նվաճեց փոխչեմպիոնի կոչումը (104+122): Նույն տարում Սաուդյան Արաբիայի մայրաքաղաք Էր Ռիյադում անցկացված աշխարհի առաջնությունում Հակոբյանը 87 կգ քաշայինների պայքարում երկամարտի 237 կգ-ով գրավեց 5-րդ տեղը (105+132):
Տաթեւ Հակոբյանի մասնակցությամբ 87 կգ քաշայինների պայքարը կմեկնարկի Երեւանի ժամանակով 21:00-ին: Հակոբյանի նախնական հայտը երկամարտում 246 կգ է:
